قديما، في بريدة، كنا نتحاشى الحديث مع بعض الطلاب الجالسين في الصفوف الأمامية، كنا ندعوهم “جحح”، خصوصا صديقنا سليمان، فكانت عيارته في الفصل “جحة الوكيل”. و “جحح” جمع “جحة” وهي البطيخ وكنا نستخدمه بمعنى مخبر. ولأني ابن عائلة من الطبقة المتوسطة الدنيا، وبعد سلسلة من بيوت الآجار التي تنقلنا خلالها، كان أول بيت ملك لنا صادف وأن كان مقابل لمبنى المباحث في الصفراء، أحد أحياء بريدة، وكنت استمتع بمتابعة السيارات التي تدخل وتخرج وكنت أحفظ لوحاتها، فحفظ لوحات السيارات كانت إحدى الهوايات المنتشرة في تلك الأيام. وفي أيام المراهقة، كنا إذا تجمعنا تجمعات شبابية من أجل “دوران” أو “تفحيط” على طريق الربيعية، نعرف المباحث من لوحات سياراتهم، إذ أنهم دائما يحملون لوحات قديمة كلها أرقام، ليست كاللوحات الحديثة التي نصفها حروف ونصفها الآخر أرقام. حينها تغير اسم المباحث إلى “دبابيس”.
هذه الأيام ومع الثورات العربية التي كانت تنتشر نتيجة توظيف الثوار لوسائل الاتصال الحديثة من “تويتر” و “فيسبوك”، اشتهرت هذه المواقع وقام عدد كبير من الأشخاص بالتسجيل فيها. وفي تويتر، عندما تسجل أول مرة، تكون الصورة الافتراضية لك هي صورة “بيضة”، ولأن غالبية “التويتريين الجدد” كانو في الغالب مندفعين في مهاجمة كل من يطالب بالاصلاح ويدافع عنه، مهاجمة فيها من التخوين والاتهام بكافة التهم الشيء الكثير، مما حدا ببعض “التويتريين الاصلاحيين” إلى اعتبارهم “مباحث” وألصق بهم تسمية “البيض”، فصار اسما جديدا لهم.
قد يكون بعض “البيض” مباحث، لكني لا أعتقد أن غالبية المهاجمين للإصلاح ومطالبات الحريات والحقوق والعدالة، كانو مباحث. وأعتبر أن وصف شخصا ما بالمباحث لأنه عبر عن رأي وإن كان ضد مطالبات الاصلاح هو مثل وصف هذا “البيضة” غيره بالعمالة والخيانة، كلا الاثنان يقومان بنقل نمط التفكير الوهابي من ميدان العقيدة إلى ميدان السياسة، مع استبدال “التكفير” إلى “تخوين”، فبعد أن كنا نكفر بعضنا، أصبحنا الآن نخون بعضنا.
أنا كنت مهووسا بمتابعة ما يكتبه هؤلاء “البيض”، وطريقة تفكيرهم، وحجم الوعي الذي يحملونه، تناقشت مع عديد منهم، مما جعلني أسمح لنفسي بأن أخرج بتعريف جديد لـ”البيضة” يختلف عن التعريف الإختزالي له بأنه محض “مباحث”. هذا التعريف تمكنت من ادراكه بعد حوار مع أحدهم، الذي بدأ نقاشي معه في تويتر، ليطلب مني رقم هاتفي لكي نتناقش على الجوال، ثم تهاتفنا مرتين أو ثلاثة في نقاشات طويلة كانت عقيمة لكنها مكنتني من معرفة شيء من هوية “الفرخ” الذي يتشكل داخل هذه البيضة. سأنقل الحوار الآن بعد الاشارة لمجموعة ملاحظات، وبعدها سأضع تعريفي الخاص للبيضة:
الملاحظة الأولى: في الحوار بعض الألفاظ النابية والمخلة، فمن لا يحب قراءة نص فيه هذه الكلمات فلا أنصحه بقرائته.
الملاحظة الثانية: نقل المحادثة هنا ليس دقيقا ١٠٠٪ فلم أسجلها، لكني اكتب من الذاكرة وحاولت تحري الدقة قدر الامكان.
الملاحظة الثالثة: الكلام الذي يتبع (-) هو كلامي والكلام الذي يتبع (=) هو كلامه.
– مرحبا
= مرحبتين
– يالله نتناقش؟
= أوكي، بس باسألك أول شي: أنت من أهل السنة والجماعة؟
– يعني تسد شفت بريداوي شيعي مثلا؟
= ههههههههه، طيب ليش تدافع عن الرافضة بتويتر طالما انك من بريدة وهي ديرة الدين والعلم؟
– لأنهم مظلومين
= أنت مصدق إنهم مظلومين؟ أنا باسألك الحين سؤال: هل تعتقد إن الشيعة بالسعودية مضطهدين؟
– إيه وش رايك؟ تخيل إنك بايران وانت سني وما تنجح بدراستك إلا لما تجاوب على أسئلة مثل “ما حكم من قال بقول اهل السنة والجماعة؟” ولازم عشان تنجح تجاوب “كافر، أو مبتدع، بدعة مغلظة” وما يسمح لك تدرس مذهبك مثلك مثل غيرك.
= بس مذهبهم كفر وشرك، وولائهم لإيران..
– هو شف، أنت الحين بامريكا، وتشوف بعينك إن الامريكان من كل ملة ومن كل لون ومن كل عرق: العربي والصيني والياباني والاسود والابيض… لكن كلهم امريكان، وكل واحد له حق يتعبد اللي يبي. امريكا الحين مديونة للصين، وتدفع يوميا ملايين الدولارات تسديد فوايد، ومع ذلك محد قال ان الامريكان اللي اصولهم من الصين ولائهم للصين، بالعكس، تلقى من ازين الاماكن اللي يروحله الواحد بنيويورك هي “تشاينا تاون”. وهنا لما تستأجر شقة، لو راعي الشقة رفض يسكنك لأنك مسلم، أو لأنك عربي، أو لأي سبب يتعلق باي شي يخصك، يمديك ترفع عليه قضية ويروح وطي..
= أنت يعني الحين فرحان بامريكا وتشوفه احسن شي، أنا باسألك: وش رايك بحميدان التركي؟
– وشبه حميدان التركي
= سجنوه الامريكان ٢٥٠ سنة بس عشانهم لقوا كتب اسلامية ببيته وانه فاتح بيته للدعوة.
٠- شكلك ما تقرا جرايد انت، تهمة حميدان استرقاق وتحرش بخادمة، ونفسهم الامريكان اللي حكموا عليه الحكم الكبير ذاك، هم نفسهم لما راجعوا القضية، خفضوا الحكم لثمان سنين لما لقوه مخطي. في حين مئات المساجين بالسعودية بدون حتى محاكمة، يعني إنه يحكم عليك ١٠٠ سنة أهون من انك ما تدري ليش انت مسجون ولين متى بتقعد، ولا بعد بتقول انه هذا الشي موب موجود؟
= طيب باسألك…
– لا انت سألت واجد، جاوب علي: وش رايك بالمساجين اللي ما حوكموا ولا وجهت لهم تهمة؟
= ما في دولة كاملة، وكل دولة فيها أخطاء…
– إذا صار دولة به اخطاء وشلون تنحل؟
= (متابعا كلامه)… بس ابي ارجع لكلامك عن حميدان التركي، تدري ليش امريكا خفضت الحكم؟
– أيوه؟
= لأن طوال العمر تدخلوا..
– يعني بتقول إنه السعودية رشت النظام القضائي الامريكي وقدرت تأثر عليهم وخفضت الحكم؟ كيف الحال؟
= ما علينا، ابي اسألك: لو قلتلك الحين إن أمك قحبة وش تقول؟
– باقول ذا مهبول وباصك السماعة.
= طيب حلو، اللي يقول إن عائشة أم المؤمنين قحبة، وش تسويبه؟
– اذا ما اثبت كلامه، يقام عليه حد القذف.
= ما يكفر يعني؟
– لنفرض انه يكفر، تدري شلون… انا عرفت انت وين تبي توصل، بس خلن اجيبه لك من الاخر. الشيعة موجودين بالشرقية من مئات سنين، ما جو هناك قبل اسبوعين بس وتونا نكتشفهم. الحين، أنت بديرة به ناس مختلفين عنك، تعتبرهم انت كفار، لكن هم بالنهاية، نتيجة صدفة ولا اي شي، طلعوا يشاركونك نفس الديرة اللي انت به، وش نسويبهم؟
= ااا
– اصبر، عندنا خيارات هنا: إما نروح لإيران ونسوي صفقة تبادل: نعطيهم شيعتنا ويعطوننا سنتهم، بس المشكلة هنا ان الاوادم موب قواطي صلصلة عشان نبادلهم، الاوادم لهم املاك وتاريخ وذكريات وروابط وجذور بارضهم، ولا لو هي سهلة نقل الناس تسذا، تسان اسرائيل عطت الفلسطينين كم مليون دولار وكلن راح لديرة ثانية ودبر عمره. الاحتمال الثاني إنه نبيدهم، إنه نذبحهم كلهم مثل ما سوى هتلر باليهود، وناخذ شعرهم وجلدهم ونسوي به صابون وأمشاط مثل ما سوى هتلر، بس المشكلة إن الله يحرم علينا ذبح الناس عشانهم كفار ولا عشانهم يختلفون عننا او عشانهم ما جازولنا، فهذا الخيار صعب. وش بيبقى؟ موب باقي إلا إن نقول الشكوى لله هذولا مواطنين مثلنا مثلهم ونتشارك مع بعض اننا نبني بلدنا… مثل ما يتشاركون الامريكان رغم انهم من كل ملة ومن كل لون ومن كل عرق ببناء بلدهم.
= هذا الكلام زين، بس مشكلتك انت ما تعرف مخططاتهم، ذولا الحين جالسين يتظاهرون عشان البحرين يبون يطلعون قوات درع الجزيرة.
– طيب انا باضرب لك مثال، لما بوش قرر يضرب العراق، طلعوا الامريكان بمظاهرات مليونية قدام البيت الابيض يرفضون هذي الحرب، وكتبوا كثارين مقالات وكتب ومسؤولين استقالوا، لكن ما في احد قال ان هذولا الامريكان اللي يرفضون الحرب موب وطنيين، أو خونة، أو ضد الوطن، ما بوش احد قال تسذا، لانهم كلهم يعرفون ان الاختلاف مبني على كل واحد وين يشوف مصلحة البلد وين… انت تشوف ان من مصلحتنا ندخل البحرين، انا اشوف موب من مصلحتنا.. وكلنا بالنهاية عيال ديرة وحدة.
= ايه صح عليك، بس ذولا يسمعون كلام ايران عشان كذا هم خونة..
– ههههههههههه، شف انا باطبق كلامك هذا عليك. افرض انه ما عندنا شيعة بالسعودية، وفيه ناس يبون اصلاحات، والدولة لانه ما تبي تصلح وتبي تشتت اهتمام الناس بهذا الموضوع، وش بتسوي؟
= وش بتسوي؟
– بتخترع عدو وتخوف الناس منه، عشان ينسون مشاكلهم ويخافون من الوحش اللي بياكلهم. حنا ما عندنا شيعة، تتوقع وش بيخوفوننا منه؟
= وشو؟
– بيخوفوننا منكم، بيقولون البدو بياكلونكم، والبدو ما لهم خاتمة، والبدو بهم وبهم وبهم… وهذا الكلام يقولونه لنا حنا الحضر، لا طالب واحد منا بديمقراطية، قالوله: تبي البدوي يحكمك؟ مثل ما انتم يخوفونكم من الشيعة، حنا يخوفونا منكم.. وتبتل المسألة تخويف بتخويف، يعني سياسة مثل فرق تسد.
= طيب أبي أسألك: الحين انت وشو اللي موب عاجبك بالبلد؟
– ترى اسلوبك بالنقاش هذا ما يوصل لنتيجة، لأنه كأنه تحقيق: اسئلة اسئلة، لازم تناقش.
= طيب جاوب علي، وباناقشك..
– منب اقولك ان السعودية مثل سوريا قمع وتعذيب واجرام، لكن عندنا قضايا رئيسية: إن الشعب ما يشارك بادارة الدولة، وانه الدولة متى ما بغت سجنت اللي تبي بدون ما تلتزم بالقانون والنظام، وان المرأة عندنا تحسب نص آدمي…
= وشبه المرأة عندنا؟ معززة ومكرمة …
– أي معززة ومكرمة وهي ما عنده أبسط الاشياء اللي هي حرية الحركة، البس بالسعودية يمديه يتنقل بحرية اكثر من المرة
= وش تقصد بحرية الحركة؟ تبي اختك تطلع مع خويها؟
– مالت عليك، هذا اللي طلع بمخك؟ ليش ما تصير مرة ما عنده احد يراجعله بدائرة حكومية وتبي تدخل؟ ليش ما تصير طالبة تبي تحضر انشطة وممنوعة؟ ليش ما تصير دكتوارت وبروفسرات ما يمديهن يسافرن الا بكرت اصفر من رجال مثلك تفكيرهم من السر وتحت… أنت ترضى تصير مرة بالسعودية؟
= انا مع اللي يحكمبه الشرع، واذا قال الشرع ان المرة ما تطلع، يصير ما تطلع، ولا انت ما تبي حكم الشرع؟
– اللي اعرفه انا ان الشرع ما به ظلم.
= وين الظلم الحين؟ دولتنا ولله الحمد دولة سلفية تطبق الشريعة..
– وتسجن الناس بدون سبب، وتخوف الناس من بعضهم، ونسمع بمشاريع بالملايين ولا نشوف شي، ونقطتين مطر تنزل بجدة وكلن يغرق بها.. هذا العدل؟
= كل دولة به اخطاء..
– ايه بس هذي الاخطاء شلون تنحل؟
= الاوامر الاخيرة حلته، حطوا هيئة مكافحة فساد..
– قبل سنة عقب امطار جدة حطوا لجنة مكافحة فساد، والى يومك ما ندري وش صار عليه، وش اللي يضمنك ان الهيئة ذي مهيب صايرة مثله؟
….. (انتهت المكالمة)
هذا الحوار موزع على مكالمتين أو ثلاثة، وهذه هي المكالمة الأخيرة:
= مرحبا
– مراحب..
= وش فيه صوتك؟ لا تصير مطقطق لك كاسين؟
– هههههههههههه، توي قايم
= للحين تكتب في تويتر؟ ما سمعت كلامي وتركته؟
– تبطي عظم اسمع كلامك…
= لا تصير طاف ياخي، ترا الموقع كله ما له ولا شهر…
– انت ما عرفته الا من شهر، ولا هو موجود من يوم ما انت فكرة براس ابوك..
= شلون يعني فكرة براس ابوي؟
– هذي نكتة، ما يصلح نشرحه تصير بايخة..
= انت مع انك بامريكا بس للحين تتكلم بلهجتك القصمنجية. على طاري القصمنجية تقرى كلام سلمان العودة؟
– ايه اقراله
= وش رايك فيه
– منب احب المشايخ انا
= تعتبر سلمان العودة شيخ؟
– وش يصير، لاعب كورة مثلا؟
= إلا نصاب وابن كلب
– والله يا انت ما لاحد عندك مقدار ولسانك وصخ وبس تسب العالم..
= انا ما احترم الا اهل السنة والجماعة، وغيرهم كلهم مخانيث ..
– طيب انا منب من اهل السنة والجماعة، انا خنيث؟
= إذا تقول عن نفسك منتب من اهل السنة فانت خنيث..
– دامنا وصلنا لهالمرحلة، فالحوار ما له معنى وانا ما انزل نفسي له، مع السلامة..
… (انتهت)
وبعد،
يمكن القول أن البيضة شخصية لم تتلق تعليما عاما محترما يعطيها أبجديات التفكير السليم وأبسط المعلومات العامة عن العالم الذي تعيش فيه، ولا تربية سليمة قائمة على التشارك وتعلمها احترام المختلف والمتفق على حد سواء. خاضعة تماما لمصادر معرفة شبه-حكومية (مجموعة الام بي سي، بشكل خاص). فهي سنية عندما يتعلق الموضوع بالشيعة، وسعودية عندما يتعلق الموضوع بباقي العرب، و”سعودية جدا” عندما يتعلق الامر بباقي شركاء الوطن. والدين عندها محصور في السياسة، فهي سنية فقط فيما يتعلق بأمور الحكم، أما في المجتمع فهي تنحل إلى: بدوية، حضرية، طرش بحر، خضيرية، قبيلية. وفي الاخلاق والسلوك فتعاني من اغتراب حاد بين ما تفعله وبين ما تقتنع بانه الصواب والفضيلة. وفي الاقتصاد فهي عالة على الحكومة لا تهدف إلا إلى استنزافها أكثر بحيث تريد مكافآت اكثر واجازات اكثر ولا تسعى لتحقيق أي إنجاز من أجل تحصيل ما تريد سوى التصفيق، ومشغولة حد أذنيها بالاستمتاع بحياتها قدر الامكان غير آبهة بكل ما حولها، نظريتها العظمى “اللهم نفسي” تبرر وجودها بحجج وقيم وعقائد لا يعبر عنها أبدا وجودها نفسه… باختصار شخصية “منافقة”، لها أكثر من مائة شخصية وشخصية.
هذي شريحة من الناس لا تسعفهم اهتماماتهم ولا هممهم, فالجلوس لتعليمهم وإنفاق الوقت على تفهيمهم جهاد, والله أعلم.
يا هلا بابو فهد يا هلا
ما اتوقع انه الموضوع صعب، أشوف استعلاء الاخرين عنهم سبب في بقائهم فيما هم فيه.
الشق أكبر من الرقعة ..
شكراً لك سلطان
العفو
أخوي سلطان ..
اعتقد انك تنهي عن شيئ و تاتي مثله. انت تتكلم عن تقبل الاخر و بنفس الوقت اجد انك تصف ” البيضه” بالاستغلال و النفاق و قلة الثقافه الخ . اذا كنا نتحدث مجتمع سليم لابد ان تقبل بهذه الفئة ” البيضة” هذا من التعايش ، ليس من التعايش القبول بالشيعي فقط و رفض ” البيضة” ، التعايش قبول الجميع احترامهم و عدم تسفيه افكارهم و مبدائهم مهما كان اختلافي و اختلافك معهم.
تعليق علي معلومه ذكرتها – اتمني يتسع صدرك له – شخصيا كنت اتابع اخبار حرب العراق يوميا علي الجرائد و التليفزيون و النت ما سمعت عن رقم مليوني في مظاهره امريكيه ضد الحرب علي العراق – اتحدث عن ” لما بوش قرر يضرب العراق” – بحثت في النت قبل اكتب تعليقي و جدت اكبر رقم كتب في ويكبيديا عن مظاهرات الحرب في امريكا كان مائة الف و الباقي اقل من هذا الرقم بكثير و لو جمت كل الارقام ما وصلت للمليون في امريكا ، اعتقد ان هذا لا يغير من واجه استشهادك ، بس اتحري المصداقيه .
أهلين عبدالله،
الله يحييك
بالنسبة لمعلومة المظاهرات، فصح عليك… ولكن تعرف المحادثات الشفهية يصير به مبالغات.
أما بالنسبة لتقبل الآخر، فأعتقد انك بالغت بتأويل موقفي، لأن لما تصف شخص بالنفاق أنت هنا منتب تقصيه عنك، بقدر ما انت تحلل وتصف سلوكه. يعني الاقصاء هو اعتبارهم عالة للمجتمع، والمطالبة بتنظيفه منهم …إلخ، لكن وصفهم بالنفاق أو السطحية أو غيره، فهذا حكمي ورايي بهم، اللي انا ما اربطه بأي حكم يتعلق بكونهم شركاي بهذا الوطن.
قبول المختلف: شي، والتنازل عن مساحة الاختلاف وعدم التذكير بها والنقاش حولها: شي ثاني.
إني أقبل المختلف، ما يعني إني ما انتقده.
ماقرأته من نقاش في موضوعك اعتقد انه جدال ,, وتركه أفضل وأعتقد ان له الأجر
شكرا لك
ايه هو جدال، لكنه مفيد، لأنه يعكس حوار بين فئتين امكانية التواصل بينهم تبدو صعبة .
والعفو
too much, he is idiot basically, before he became an active “egg”!
ههههههههههههههههه
عيب هالحتسي
الأكثرية العظمى من المجتمع السعودي يحمل هذا التفكير عن الشيعة طبعاً – مع عدم استخدام مثل هذه الالفاظ طبعاً – في الجامعة كانت الأستاذة تقولها بالفم المليان (الشيعة دائماً خونه)مافيه أحد يحبذ ظلم أي مسلم
كلنا في النهاية مسلمين
عبدالله القحطاني اتفق مع كل كلمه قلتهاا .. نطالب بالحريه والدمقراطيه لوجهة نظرنا ونرفض بشدة وجهة نظر غيرنا هذا هو شعار الثوار اللذين اندسوا خلف مسمى الحريه والدمقراطيه لينفذوا مخططات للخميني وغيره .. في الخليج العربي ” الله ينصر اخوننا في سوريا ويعيد مصر افضل مما كانت .. ويتم نعمة الامن والامان على بلاد الحرمين … صاحب الموضع ارى ان امريكا ودراستك فيها اثرت كثيرا عليك .. لأنني مراءه ومتعلمة وذات منصب وظيفي وامارس حريتي في السعوديه على اكمل وجه دون ماذكرت فنحن كرمنا اهلنا وديننا ولسنا بحاجه لك ولي غيرك يبحث لنا عن حريتنا .. “وجهة نظر تقبلها يامن يطالب بالدمقراطيه “
والله فيه فرق بين تقبل الرأي المخالف ونقده، أنا أرفض آرائك، لكن ما اخونك ولا اجرمك ولا اتهمك بالعمالة وانك تبعين لدوة او سفارة خارجية. بالمقابل، بانتقد وباحلل وباناقش وباكتب ضد افكارك زي ما ابي طالما ما اجرح ولا اتعرض لشخصك .
هذا شي، الشي الثاني إني أنا منتهي من مبطي قبل ما اطب امريكا، وعندتس هنا بالموقع كتاباتي من ٢٠٠٧، بالعكس امريكا عقلتن شوي خخخخ
أنت اللله هيألتس الظروف وضبطت معتس. لكن فيه غيرتس وحدة متفوقة تجيه دعوة تحضر ورشة عمل في لندن، ويرفضون اهله ولا تملك حرية انه تسافر ولا لا، وثانية ام عيال تنطرد من الدوائر الحكومية لأن ما معه رجل يجسره، وهكذا، لما نتكلم عن موقف، ما نتكلم عن حياتنا الشخصية نتكلم عن الناس اللي مثلنا. يعني كونتس انتي حالتس ممتازة هذا ما يعني كل الناس مثلتس، فيه رجال ما يخافون الله ويستغلون عدم استقلال المرأة القانوني عشان يحولونها لأمة ومستخدم.
ذكرتني بفلم البرئ لأحمد زكي ..
جنون !
ماقرأته فعلاً جنون !
بالرغم من معرفتي التامة بهذه الفصيلة بالذات ، لكن أن اشاهدها من بعيد أمر يفقدك عقلك فعلا !
ارجو أن تكثر مثل هذه الأحاديث حتى يتم فقشهم .. بيضة بيضة … زنقة زنقة
ههههههههههههههههههه، فصيلة؟
حسيت نحتسي عن ديناصورات ههههه
مقالة مقبولة نوعاً ما (في البداية)
لكن في النهاية عدنا لنفس الدائرة : عدم احترام الرأي الآخر.
وإذا لم أكن مع الإصلاحيين وأسب في الحكومة ليل ونهار …
فأنا من المفسدين المغيبين المتخلفين الغوغائيين الفرحين بالإجازة السخيفين.
أعجب شيء في من يسمون أنفسهم بـ (الإصلاحين) أنهم اختلقوا حرب باردة مع أبناء وطنهم
دفاعاً عن أشخاص (مو سائلين فيهم) وهم الشيعة.
وأخوف ما أخاف أن تسخن هذه الحرب أكثر.. ونصل إلى مجتمع سعودي مفكك بالفعل
بسبب نظرة التعالي من قبل (الإصلاحيين) لباقي أفراد الشعب (المغيبين).
وانا لست من (البيض) لكني قرفت من فلسفة الإصلاحيين الزائدة عن الحد.. ومن تعاليهم
كرهت أسلوبهم.. وصرت لا شعورياً أدافع عن البلد والحكام
مع نقمتي على أشياء كثيرة فيها.. لكن (ولا يجرمنكم شنئان قوم على ألا تعدلوا)
فاتمنى احترام كل الآراء بما فيهم الحكومة والبيض .. لأنهم مهما كانوا سيئين لن يكونوا أسوأ من الشيعة.
مع احترامي لك في نقاط موب دقيقة بكلامك:
١- فيه فرق بين “السب” و “النقد”. اللي اعرفهم من الاصلاحيين ينتقدون الحكومة، لكن ما يسبون.
٢- فيه فرق بين “تقبل الاخر” و”نقده”. وإنك تنقدين شخص، هذا يعني انك تعترفين بوجوده ومقره له بحقوقه لكن تنتقدين بعض ما تختلفين فيه معه.
٣- محد اختلف حرب باردة، اللي اختلق حرب باردة اللي من عشر سنين وهم يقولولنا حوار اديان وتقارب وحرية وكلنا سعوديين، وفجأة يتذكرون انه في شيعة بجمبنا.
٤- الشيعة “ابناء وطن” مثلهم مثل غيرهم، والتفريط بحق جزء من ابناء الوطن بوابة تفتح باب التفريط بحقوق كل ابناء الوطن.
وشكرا لتس
الإقصائي لا يمكن العيش معه لأنه ليس فقط يرفض الإستماع لوجهات النظر الأخرى، و لكنه يريد دفها و يجعل وجهة نظره الحقيقة التي لا تخالطها الظنون.
بالعكس أنا متفائل،
الإقصائي المخيف مثل إبراهيم البليهي، شخص مقتنع تماما بافكاره ومصر إنه هي الصحيحة وما يتقبل اي حوار مع اي طرف ثاني.
اما هذولا، فهم اصلا ما عندهم اراء، فيصيرون اقصائيين لانهم ما يعرفون يناقشون، كثر النقاش معهم يدفعهم لطرح تساؤلات تخليهم يعيدون التفكير بكثير من المواضيع.
للأسف،
اعتقد انك تسمح بالحوار،، ما حدث بينكم مجرد “سواليف”
وكلامك لا يوجد فيه أي منطق ولا ومشتت
كنت أتمنى انكم تكلمتوا في شيء،، لكنكم تكلمتوا في كل شيء ولا فيه اي شيء مفيد
شف سلطان
من واقع معرفة شخصية أقول إنك تسذوب !
وتسذبك هذا مب تسذب تافه لا ( تسذب معرفي )
بس بالنهاية هو تسذب .
يعني تبي تقنعن بهالمقابلة إنك جبت الزبدة وما حصل ؟
يعني الرجال ردوده كمحرض لك , بدليل حتسيك أكثر من حستيه لأنك عارف أفكار وقاعد تعبر عنها بشكل كويس لكن الرجال كلامه طار بالهواء .
بس تبي الصدز حلوة سالفة يوم أنت فكرة ببوك
اعذرني..
لكن اللي لاحظته انك تحاول تبرز نفسك بالتدوينه
يعني واحد يتكلم بهذا الاسلوب تعرف انه سفيه والمفروض ما تدخل معه بنقاشات أكبر من مقامه
ومن باب أولى ما تنشر هذا النقاش على انه يمثل حوار بين شريحتين من المجتمع!!
فيه ناس كثير تخالفك الرأي وممكن ترد عليك بأسلوب مقنع وبحجج واضحة..
كلّنا يريد الاصلاح, ولكن بعضنا يريده بما يرضي الله ويضمن استمرار نعمة الأمن والأمان..
انت استخدمت حقّك في حرية التعبير وهو استغلّه بالقذف والألفاظ البذيئة..
ملاحظة: أهنّئ من على مثل صبرك وطول بالك في تحمل القذف والسب…
فعلاً .. هذا هو نمط تفكير البيض ..
أذكر أحد المرات المتوتر المعروف وليد أبو الخير , كان يتكلم في احد القضايا ( أعتقد عن مساجين الرأي ) ..
رد عليه أحد البيض بهذا الرد : كل الإصلاحيين على “. . . ” ( كلمة بذيئة من ثلاث حروف ) !
صحيح أني أختلف مذهبياً مع المساجين اللي صارت عليهم أحداث الاسبوع الماضي في الرياض ..
لكن أتعاطف معاهم لأن بعضهم سجن بدون توجيه تهمة و بعضهم بدون محاكمة ! و هذا ابسط حقوقهم
و أيضاً أتعاطف مع أهلهم لما البيض يتمسخرون على المساجين و يطلبون من الحكومة أنها ما ترحهم زيادة !
sorry I don’t have Arabic Keyboard..
Sultan ,,
What time you are planning to come to Saudi?
I think you will be in a real trouble !! Careful mate .. We don’t want to miss you!! ..
يامال العافيه ياسلطان ..
في الفتره الأخيره كثرت نقاشاتي على موضوع الشيعه .. واغلب كلام اللي اناقشهم تتلخص بهالترتيب ..
يسبون الصحابه —–> يقذفون عائشه رضي الله عنها ——-> ولائهم لإيران وليس للسعوديه ——> مفروض ما نأمنهم .. وطبعاً لازم يضربون الأمثله هذي ( لو قلت لك انك زاني وش بتقول؟ لو صفقتك كف الحين وش بتسوي بتحاورني ولا بترد علي) ومن هالكلام ..
لكن من يوم أقولهم وش الحل طيب؟؟ نحرقهم؟ نفجر مناطقهم؟؟ نشلهم كلهم ونحطهم بسجن؟؟ يسكتون ..
انا من وجهة نظري باختصار .. خل الواحد يعتقد باللي يبي .. وانا دوله ولي قانوني ونظامي .. اللي يسب الصحابه بحاكمه .. اللي يثبت عمالته لإيراني ولا لأي دوله أجنبيه بجلده .. إلي ألقى معاه اسلحه دافنها بالمقابر بلسبه بالخيازرين .. وخلصنا .. أما سالفة نظرية المؤامره وعندهم نوايا وولاء خارجي ماراح نخلص ..
————
سالفة على جمب : يقولي ياخي ولائهم لإيران .. ماتشوف لبسهم للعمامه الايرانيه؟؟ وربي وااااضحه .. قلت له طيب والشيخ المصري اللي يدق الثوب والطاقيه الشخال والغتره بدون عقال وش وضعه؟؟ عميل سعودي؟؟ قالي ياخي هذي لبستهم .. قلت له طيب والنيجيري اللي يلبس ثوب وشماع .. قال لا هذا مدري عنه :))
عموما النقاش في هالموضوع يعطيك لياقه نقاشيه فقط 🙂
مقال طريف،،
أحببت أن أدلي بدلوي،،
في العالم العربي ومع موجة الثورات التي اجتاحت المنطقة،، اكتشفت الحكومات إن الشبكات الاجتماعية الافتراضية لها دور جبار في حشد الرأي العام ضد الفساد ونحو الإصلاح والتغيير، في مصر مثلا ، كانت المعارضة أشبه بالصورية ، وحتى في خضم المظاهرات كانت متأخرة وتتبع الحدث،، بينما كان شباب الفسبوك وتويتر أكثر تنظيما وأسرع تفاعلا بشكل لافت،،وكان ذلك من أسباب نجاح الثورة المصرية،
كان دور المخابرات العربية محصورا في الأماكن الاجتماعية المعتادة ،،قهاوي ، ديوانيات، مدارس،جامعات، لكن الوضع تغير الآن ،، يكفي أن أدعي أني صديق لك في فيسبوك أو تويتر لأعرف ما تفكر به لحظة بلحظة،،بالاضافة إلى ضرورة تواجدهم (البيض) كقوة مضادرة في أي مجموعة تدعو للتظاهر أو الإصلاح الغير مرغوب به حكوميا،،
الإصلاحي في بلادي يتوجس خيفة قبل أن يقول رأيه بصراحة ، فالأعين في كل مكان والجدران تسمع وتتكلم ، ولذا لا عجب أن يشكوا في كل من ليس لديه صورة شخصية وحسابه لم يكمل الأسبوع(البيض والدبابيس)،،
ليست المسألة عدم قبول الآخر بقدر ما هي شك وريبة في كل ما هو حولك،،توقيع بيان يمكن أن يلقي بك في السجن ولفترة غير معلومة وبدون محاكمة
الطريف أيضا أن الصديق الشاك في أخيه المواطن الشيعي لم يكلف نفسه عناء النقاش مع شيعي ، واكتفى بمناقشة أخ من أهل السنة والجماعة،، أستطيع القول أننا نعيش في وطن واحد ونعمل في نفس المكان لكن بيننا جدران وهمية وحواجز تحتاج لحوار صادق لإزالة التراكمات التاريخية،،
المظاهرات التي حدثت في المنطقة الشرقية كانت قدبدأت أصلا قبل أحداث البحرين ، وكان المطلب إطلاق صراح التسعة الذين مضى على سجن بعضهم أكثر من 16 عام بدون محاكمة ، خروج درع الجزيرة كهتاف جاء متأخرا فيها، وهو شئ طبيعي فأواصر الإخوة والنسب والنسيج الاجتماعي هو نفسه في البحرين والقطيف ومن الطبيعي جدا أن يتفاعل الإخوة لمصاب إخوتهم ، خاصة أن الوضع هناك مأساوي حقيقة، والمسألة ليست طائفية وإنما من منطلق إنساني بحت،، كما تفاعل الجميع مع غزة أيام الحرب ومع مصر أيام الثورة وووو…ا
آسف للإطالة لكن أحببت فقط توضيح بعض النقاط
اتفق معك في كل شي ..
لكن اختلف معك عن المرأه بالعكس انا ااشوف ان المرأه حقها محفوظ
واذا كانت تسافر بورقة وش المشكلة !؟
الى واثق من اهله وعارف انهم عن مية رجال يطلع ورقة
والى ماوده يخليها ماتسافر الا معه ماشوف انها مشكله …
شف انا وانت وهو نختلف في الرأي ولكن لازم نعرف كيف نعيش مع بعض ورأينا مختلف ..هذي الفكرة او المنطق لايعترف بها الشعب السعودي ولازم ندرسها للأجيال الجديدة
واذا كنا بنطرد كل من يخالفنا في الرأي بنصير مثل سالفة مطوع بريدة
وبالنسبة لسليمان العودة باقي ماقررت أنا أحبه والا لا !!!!
ونسيت اهم شي ترا يسمونني بتويتر البيضة لأني اخاف واكره الرافضة بعد ماقرأت قصصهم مع السنه في العراق .
وووونسيت اقول تراني بيضة ديناصور لأني مسجله في تويتر من 2009
فعلا نحتاج الى تثقيف البيض,,وان يتركو العناد والتكبر على ارائهم وان يحترمو انفسهم قبل ان يحترمو غيرهم ولايكونو “مع الخيل يالشقرا” !! :/
ملحوظه شاطحه قليلاً، ولكن من ملاحظه ومتابعه، اغلب هؤلاء الأشخاص ضعفاء في الإملاء !! ولديهم أخطاء لغويه فاحشه كعدم التفريق بين الظاد والضاء والألف الممدوده والمقصورة .. الخ من هذه الأخطاء ..
اعجبتني إشارتك لتاثير قنوات مجموعه MBC على نمط تفكير هذه الفئه.
بالمناسبه .. طلعت من دفعتي 22 !
لاتعليق .. الحمدلله اني سنيه
لا اله الا الله محمد رسول الله ..
🙂
بأعرف ما رجع اعتذر؟
هذا أنا أظنه أقل من بيضه 🙂
شكرا سلطان مثل هذا الكلام يخلي الواحد مايفقد الامل وإن كنت اختلف معاك في ان كثيرا من البيض هم ضحايا بالنسبة للإخت nooravoiseما ادرى اذا كانت بتدرس الاجيال القادمة ان الروافض الي يرفضون الفساد والباطل من اساس الدين ان اكرههم .
والسلام عليكم ورحمة الله وبركاته
الى ابو احمد اكيد بنعلم الجيل القادم أن الإسلام بريء من الروافض ودينهم
ولكن لا يمكن أن أقول لأبني مثلا احمل معك سلة قنابل وفجّر رأس كل رافضي يمر بقربك
ولا أقول له أجمع الروافض في طرد وأرسلهم لإيران
الروافض يعيشون في مناطق معينه من السعوديه من ميئات السنين حقيقة لا ننكرها
مع إحترامي لكم اثنينكم لكن نقاشكم نقاش أطفال .. ويتضح جلياً جهلكم بما يدور في الساحه ..
حتى في امريكا فيه مساجين ما وجهت لهم تُهم وعندكم اكبر مصيبه ( قوانتانامو )
ويبدو لي جهلك انك ما تتابع فضائيات عربيه ..
اما محدثك فهو أجهل منك .. اجل طوال العمر
انا واحد شيعي عايش في الشرقيه ………….. ما مره قذفنا او اتهمنا عائشة زوجة الرسول صلى الله عليه واله وسلم او اي اساة لها لان في معتقدنا لا يجوز سب زوجات الرسول ………….او سب الصحابه بل نقول في الدعاءوالذي اتهمنا فيه بانننا نسب الصحابه (اللهم العن من ظلم حق محمد وال محمد من الاولين والاخرين ) …………….. او ولئنا لي ايران ما اتذكر احد من المشايخ قال لنا هذه ايران دولتكم بل نحب الوطن السعودي وبل نفديه باروحنا ………….. ولكن نحن كشيعه في السعوديه مظلومين ومضطهدين ومسلوب حقنا لايمكن حتى ان نكون ذو مناصب عاليه واشكرك اخوي سلطان على هذا الكلام واتمنى لك التوفيق
يارجال معا احترامي انت فقط متأثر بشخصيات تويتر,لأن اللي بالتويتر صار كلامهم واحد (المساجين_المرأة_الدفاع عن الشيعه)
فـ هاذي نتيجه التأثير الكبير منهم,ولو احلف انك كنت عادي ومطقع للسواليف الاصلاح بس بعد ماشتركت في تويتر انجذبت معا كبار تويتر (اقصد من لديهم المزيد من المتابعين)
يعني سبيت بلدك و تعاند وتشمئز,يأخي لو انت في امريكا ماكان درست بجامعه مجانيه وقوية ولا أن تنام وانت مرتاح.
فـ احمد ربك على النعمه اللي انت عايش فيها,واترك عنك اهل الاصلاح مجرد بهائم. حتى الشيوخ ماتبي تذكرهم على لسانك
وبالنسبه للشيعه انا مابحكم عليهم,انت احكم عليهم وعيش بينهم ارجووك رجاء حاار فقط زور القطيف واذهب الى احد اسواقهم الشعبيه ارجوووك.
اقولك حادثه لي (انا عايش بالشرقيه):تعطلت علي السيارة قبل كوبري سيهات والقطيف يعني على خط الدمام ووللاسف أشرت لأشخاص ووقفو لي,ظهروا انهم شيعه , أنا لم أكن قلق لأني لم اتوقع ان يحصل شي,بعد 5 دقائق من المشي قاموا بضربي ضرب مبرح بدون سبب .قفزت من السيارة ووقفوا السيارة ونزلو وراي ويضربوني ويتفلوني ويقولون ياوهابي..
هذا غير القصص الأخرى اللي اخذتها موقف من عندهم,وخاصه دين التقيه (قبل كنت لم اصدق التقيه,الأن صدقته وبقوه بعد ماكتشفتهم)
بس اللي ابيه منك اذهب داخل مدينتهم مو برا وخذلك اسبوع بس.
وعلى فكره انا ولله لأني بيضه ولااصلاحي ولاشيخ ولاحتى ناقد.أنا انسان احب اكون نفسي واشوف مستقبلي وحياتي والحمدلله
مالك ومالَ الربيعية شيخنا..!!!
أمزح أمزح..
مقالة جميلة.. أنت دائماً تكتب أشياء جميلة..
السلام عليكم ورحمة الله وبركاته
مع احتارمي لك يا سالم محمد القصيبي اصابعك مو سوى
واذا كان كلامك صحيح هذولا ناس مراهقين انا من الشرقيه
وعندي صديقات من الشيعه والله بالعكس ما شفت منهم
الا كل خير وكفاكم جاهله الغرب تطور وحنا تفكيرنا
تفكير سطحي سني وشيعي عيب والله عيب الطعن
في بعضنا البعض خلوكم ايد وحده لا تفرقه بين
سني وشيعي دول الخليج احسن منا حتى الامريكان
ما يضحكون علينا هم احسن منا ولا فرقوا بينهم بين
بعض بالعكس كلهم ايد واحده على انهم عندهم معتقدات
كثيره بس في الاخير الكل يحترم الثاني
شكرا سلطان
دخلت تويتر واسمع ببعض الالفاظ ومااعرفها ومن ضمنها البيض
بالنسبة لكلامك عن المرأة ترى المرأة ماخذة حقها وزود بعد وللأسف على حساب الرجل شف الإسلام شلون كرمها شف وش كانت قبل الإسلام وأما الغرب فهم اكثر من أهانها http://www.youtube.com/watch?v=Nc1-sNfikr0 أيضا سنة الله في الحياة التفاضل الأنبياء أفضل منا مثلا والرجل أفضل من المرأة ..
تحياتي لك
من ينشر للناس “شوفو هذا هزأ فيني وانا كنت محترم معه” فقد ابتعد عن كونه محاور محايد، كما يحاول أن يثبت. لكن يأتيه ما يريد، وهي السمعة والتعاطف و بعض الشهرة. إنها النجاحات العزيزة على قلبه أكثر من احترامه لنفسه أثناء خلوته معها.
دوماً يوجد هنالك من سيصدق كل شيء يقوله أحدهم، و ينفش ريشه. وطالما لمسيلمة الكذاب أتباع، فكلٌ سيجد أتباع لا يسألون، وسيصدقون حوار مع بيضة، و تواضع مفكرهم الملهم أمامها.
ليش ماتصير أنت الأول ؟